एनपीएल: पहिलो ६ खेलमा नेपालीलाई प्लेयर अफ द म्याच, सोमपालको पुरस्कार सडकका जनावरलाई

नेपाल प्रिमियर लिग, एनपीएलको तेस्रो संस्करणका पहिला ६ वटै खेलमा प्लेयर अफ द म्याच नेपाली खेलाडी घोषित भएका छन्। शेर मल्लले पहिलो, कमलसिंह ऐरीले दोस्रो र युनिश विक्रम सिंह ठकुरीले तेस्रो खेलमा यो पुरस्कार पाउनुभयो। चौथो खेलमा राष्ट्रिय टोलीका कप्तान दीपेन्द्रसिंह ऐरी, पाँचौँमा राहुल यादव र छैटौँमा सोमपाल कामी उत्कृष्ट खेलाडी बन्नुभयो।

बिहीबार कर्णाली याक्सका कप्तान कामीले विराटनगर किङ्सविरुद्ध ६२ रन बनाउनुका साथै ४ विकेट लिएर टोलीलाई ४ विकेटको जित दिलाउनुभयो। खेलपछि उहाँले प्लेयर अफ द म्याचबापत पाएको पूरै रकम सडकका जनावरको हेरचाह गर्दै आएकी सिर्जना ठकुरीलाई दिने घोषणा गर्नुभएको छ। सामाजिक सञ्जालमा उहाँले व्यक्तिगत उपलब्धिभन्दा टोलीलाई जिताउन योगदान दिन पाउनु ठूलो कुरा भएको लेख्नुभएको छ।