कांग्रेस अधिवेशन: देउवा समूहको समानान्तर तयारी, मंसिर मसान्तभित्र जिल्ला–प्रदेश अधिवेशन गर्ने तयारी

नेपाली कांग्रेसका पूर्वसभापति शेरबहादुर देउवा पक्षले छुट्टै महाधिवेशनका लागि तल्लो तहका अधिवेशन अघि बढाएको छ। समूहको भदौ १७–१८ को बैठकले १५औँ केन्द्रीय महाधिवेशन मंसिर २१ देखि २३ गतेसम्म गर्ने निर्णय गरेको थियो। समूहका नेता गुरु बरालका अनुसार अधिकांश जिल्लामा तल्लो तहका अधिवेशन सकिएका छन् र अब जिल्ला अधिवेशन सुरु भएको छ।

बाढीपहिरोले कार्यतालिका केही ढिलो सुरु भए पनि तोकिएकै समयमा महाधिवेशन सक्ने तयारी रहेको उहाँले बताउनुभएको छ। ओखलढुंगामा दसैँ र तिहारबीच सबै पालिका र दुवै प्रदेशसभा क्षेत्रमा सर्वसम्मत नेतृत्व चुनिएको जिल्ला निर्वाचन समितिका सहसंयोजक अधिवक्ता चन्द्रमणि अधिकारीले जानकारी दिनुभएको छ। रोल्पा जिल्ला अधिवेशनबाट मानबहादुर खत्री सर्वसम्मत सभापति चुनिनुभएको छ।

समूहले यसअघि डोटी, बैतडी, डोल्पा, हुम्ला, जुम्ला, मुगु, कालिकोट, रुकुम पश्चिम र संखुवासभामा पनि अधिवेशन सकेको छ। यता गगन थापा नेतृत्वको कांग्रेसले असोज १८ देखि २३ गतेसम्म १५औँ महाधिवेशन गरिसकेको छ। सो पक्षले बाँकी जिल्ला र प्रदेश अधिवेशन मंसिर मसान्तभित्र सक्ने तयारी गरेको छ।

पार्टीका ७७ जिल्लामध्ये एउटा मात्र निर्वाचन क्षेत्र भएका ३५ जिल्लामा अधिवेशन भइसकेको र ४२ जिल्ला बाँकी रहेको जनाइएको छ।