भारतमा दिएको अभिव्यक्तिमा अर्थमन्त्री वाग्लेमाथि भीम रावलको आलोचना

अर्थमन्त्री डा. स्वर्णिम वाग्लेले भारतमा दिएको राष्ट्रवादसम्बन्धी अभिव्यक्तिमाथि राजनीतिक वृत्तमा पक्ष र विपक्षमा बहस चलेको छ। असोज ६ गते भारतीय टेलिभिजन एनडीटीभीको 'वर्ल्ड समिट २०२६' कार्यक्रममा मन्त्री वाग्लेले नेपालमा भारतविरोधी भावनासँग जोडिएको राष्ट्रवादको समय सकिएको बताउनुभएको थियो।

पूर्वउपप्रधानमन्त्री भीम रावलले फेसबुकमा यसप्रति कडा आपत्ति जनाउँदै रास्वपा सरकार र अर्थमन्त्रीमाथि 'आत्मसमर्पणवाद र लम्पसारवाद'को आरोप लगाउनुभएको छ। नेपाली राष्ट्रवाद कुनै देशको विरोधमा नभई सार्वभौमसत्ता, स्वाधीनता र भौगोलिक अखण्डताको रक्षामा आधारित रहेको रावलको भनाइ छ। आफ्नो तर्कका लागि उहाँले संविधानको धारा ५, ५१ र २७९ को उल्लेख गर्नुभएको छ।

रावलले रास्वपा सरकारका गतिविधि राष्ट्रिय हितविपरीत रहेको आरोप पनि लगाउनुभएको छ। केही पूर्वपरराष्ट्रमन्त्री र विश्लेषकले राष्ट्रिय सरोकारको विषयमा विदेशी भूमिमा बोलेको भन्दै मन्त्रीको आलोचना गरेका छन् भने कतिपयले उहाँको भनाइको समर्थन पनि गरेका छन्। पूर्वराजदूत विजयकान्त कर्ण र अरुण सुवेदीले मन्त्रीको भनाइ सही भए पनि नेपालमा भारतविरोधी भावना पूरै नसकिएको बताउनुभएको छ।