मध्यावधि चुनावपछि इरानमाथि थप सैन्य कारबाहीको अमेरिकी चेतावनी, इरानको प्रतिक्रिया

अमेरिकाले नोभेम्बर ३ को मध्यावधि कंग्रेस निर्वाचनपछि इरानमाथि छोटो तर तीव्र सैन्य कारबाही गर्न सक्ने सन्देश पर्सियन खाडीका केही मुलुकलाई दिएको छ। द वाल स्ट्रिट जर्नलका अनुसार पेन्टागनले जोखिममा रहेका पश्चिम एसियाका सैनिक अड्डाबाट आफ्ना कर्मचारी हटाएको छ र बमवर्षक तथा लडाकु विमान तयारीमा राखिएका छन्। राष्ट्रपति डोनाल्ड ट्रम्पले अन्तिम निर्णय नगरे पनि इरानी पूर्वाधार र आणविक संरचनामा ठूलो आक्रमणतर्फ ढल्किनुभएको पत्रिकाले जनाएको छ।

सेन्टकमले अक्टोबर १६ मा कंग्रेसमा पेस गरेको गोप्य अनुमानअनुसार इरानविरुद्धको युद्धमा अमेरिकी खर्च करिब ४७ अर्ब डलर पुगेको छ। यो खर्च अघिल्लो महिनाको तुलनामा ३ अर्ब डलरभन्दा बढीले बढेको हो। हतियार र गोलाबारुद फेरि जुटाउन मात्र करिब २९ अर्ब डलर लागेको छ।

थप सैन्य सञ्चालनका लागि करिब १२ अर्ब र नष्ट उपकरणको सट्टा नयाँ व्यवस्था गर्न करिब ६ अर्ब १० करोड डलर छुट्याइएको छ। इरानी विदेश मन्त्रालयका प्रवक्ता इस्माइल बाघाईले १४ बुँदे समझदारीपत्रबारे ट्रम्पको टिप्पणीले अमेरिकी कूटनीतिक प्रतिबद्धता खोक्रो रहेको देखाएको बताउनुभएको छ। टेक्सासको लुब्बकमा भएको चुनावी सभामा ट्रम्पले अमेरिकाले युद्ध थालेको नभई इरान नै सन् १९७९ देखि अमेरिकासँग द्वन्द्वमा रहेको दाबी गर्नुभएको थियो।

बाघाईले अन्तर्राष्ट्रिय कानुन छानेर लागू गर्न नमिल्ने बताउनुभएको छ।