‘कबड्डी ५’ ले पाँच दिनमा ७ करोडभन्दा बढीको व्यापार गर्‍यो

रामबाबु गुरुङ निर्देशित चलचित्र ‘कबड्डी ५: आफ्टर द फाइनल म्याच’ले प्रदर्शनको पहिलो पाँच दिनमा बक्स अफिसमा राम्रो कमाइ गरेको छ। प्रस्तुतकर्ता बाँसुरी फिल्म्सका अनुसार शुक्रबार प्रदर्शनमा आएको फिल्मको मङ्गलबारसम्मको कुल ग्रस आम्दानी करिब ७ करोड रुपैयाँ नाघेको छ। यो आँकडा निर्माण पक्ष आफैँले सार्वजनिक गरेको हो।

निर्माण टोलीका अनुसार अहिलेसम्म करिब २ लाख ६० हजार दर्शकले फिल्म हेरिसकेका छन्। प्रदर्शनको दुई दिनमै क्युएफएक्स सिनेमा चेनले फिल्मलाई सुपरहिट घोषणा गरेको थियो। गुरुङ आफैँले लेख्नुभएको यस फिल्मका निर्मातामा उहाँसँगै मणिराम पोखरेल, मधु मिजार र विशाल गुरुङ हुनुहुन्छ।

‘कबड्डी’ शृङ्खलाको यो पाँचौँ फिल्ममा पुराना परिचित पात्रसँगै नयाँ अनुहार पनि थपिएका छन्। दयाहाङ राई, विपिन कार्की, विजय बराल, बुद्धि तामाङ, रिश्मा गुरुङ, सृजना गुरुङ र मिरुना मगरलगायत कलाकारको यसमा अभिनय छ। दर्शकबाट भने फिल्मले मिश्रित प्रतिक्रिया पाएको छ।

कतिपय दर्शकले कथा र प्रस्तुति मन पराएका छन् भने कतिपयले अपेक्षाअनुसार नभएको प्रतिक्रिया दिएका छन्। यसअघि शृङ्खलाको चौथो फिल्म ‘कबड्डी ४’ले करिब २१ करोड ४० लाख रुपैयाँभन्दा बढीको बक्स अफिस कलेक्सन गरेको थियो। पाँचौँ फिल्मले पहिलो पाँच दिनमै उक्त रकमको करिब एकतिहाइ कमाइसकेको छ।