एनपीएलमा नेपाली बलरको दबदबा, आज सुदूरपश्चिम र पोखरा भिड्दै

कीर्तिपुरमा जारी नेपाल प्रिमियर लिग, एनपीएलको तेस्रो संस्करणमा अहिलेसम्मका तीनै खेलमा नेपाली बलर प्लेयर अफ द म्याच बनेका छन्। कात्तिक ९ गतेको उद्घाटन खेलमा लुम्बिनी लायन्सका शेर मल्लले सुदूरपश्चिम रोयल्सविरुद्ध ४ ओभरमा ११ रन दिएर ३ विकेट लिएका थिए। उनले शेरफेन रदरफोर्ड, स्कट कुगेलेन र विनोद भण्डारीलाई आउट गरेका थिए र लुम्बिनी ७ विकेटले विजयी भएको थियो।

मल्लले प्लेयर अफ द म्याचबापत ५० हजार रुपैयाँ पुरस्कार पाएका थिए। कात्तिक १० गते चितवन राइनोजले विराटनगर किङ्सलाई ८ रनले हराउँदा कमलसिंह ऐरी उत्कृष्ट खेलाडी बनेका थिए। कर्णाली याक्सका युनिश विक्रम ठकुरी पनि प्लेयर अफ द म्याच बन्ने नेपाली बलरमा छन्।

आज साँझ ५ बजे त्रिवि अन्तर्राष्ट्रिय क्रिकेट मैदानमा पोखरा एभेन्जर्स र सुदूरपश्चिम रोयल्स भिड्दैछन्। कुशल भुर्तेलको कप्तानीको पोखराले यो संस्करणको पहिलो खेल खेल्दैछ। अघिल्ला दुई संस्करणमा प्लेअफ पुग्न नसकेको पोखराले यसपटक त्यो इतिहास बदल्ने लक्ष्य लिएको छ।

दीपेन्द्रसिंह ऐरीको नेतृत्वको सुदूरपश्चिम पहिलो खेलमा लुम्बिनीसँग पराजित भएको थियो। लगातार दुई संस्करणको फाइनल पुगेको सुदूरपश्चिमले अघिल्ला दुवै संस्करणमा पोखरालाई हराएको थियो। प्रतियोगितामा ८ टोली सहभागी छन् र फाइनल मङ्सिर ५ गते हुनेछ।