दसैँको लामो बिदापछि रगत अभाव, रेडक्रसको रक्तदान अपिल

दसैँको लामो बिदामा रक्तदान कार्यक्रम हुन नसकेपछि नेपाल रेडक्रस सोसाइटीले सर्वसाधारणलाई रक्तदान गर्न विशेष आग्रह गरेको छ। बिदाका बेला केन्द्रीय रक्तसञ्चार सेवामा रक्तदान कार्यक्रम सञ्चालन भएनन्, तर अस्पतालमा उपचाररत बिरामीका लागि रगतको माग दैनिक बढिरहेको छ। केन्द्रीय रक्तसञ्चार सेवाका प्रमुख डाक्टर प्रकाश यादवका अनुसार केन्द्रमा सबै रक्तसमूहको मौज्दात सकिएको छ।

होल ब्लड, प्याक्ड रेड ब्लड सेल अर्थात् पीआरबीसी र पीआरपीसमेत बाँकी नरहेको सोसाइटीले जनाएको छ। यसले बिरामीलाई आवश्यक रगत जुटाउन कठिन भएको डाक्टर यादवले बताउनुभएको छ। उहाँले अन्तिम पटक रक्तदान गरेको तीन महिना पूरा भएका स्वयंसेवी र १८ वर्ष उमेर पुगेका स्वस्थ युवायुवतीलाई अघि सर्न अनुरोध गर्नुभएको छ।

सोसाइटीका अध्यक्ष डाक्टर विशालकुमार भण्डारीले चाडपर्वमा कार्यालय र शैक्षिक संस्था बन्द हुँदा रक्तदान कार्यक्रम घटेको बताउनुभएको छ। यसले पर्याप्त रगत आपूर्ति सुनिश्चित गर्न कठिन भएको भन्दै उहाँले स्वयंसेवी रक्तदातालाई सहयोगका लागि आह्वान गर्नुभएको छ। यसैबीच बुधबार असन सेवा समितिले काठमाडौँ महानगरको सहकार्य र रेडक्रसको प्राविधिक सहयोगमा असन टोल र सुन्धारामा रक्तदान कार्यक्रम आयोजना गरेको छ।

रगत चाहिएमा वा रक्तदान गर्न चाहेमा केन्द्रीय रक्तसञ्चार सेवामा सम्पर्क गर्न रेडक्रसले आग्रह गरेको छ।