ब्राजिलमा लुलाको पुनरागमन, पराजित फ्लाभियो बोल्सोनारो अमेरिका गए

ब्राजिलको राष्ट्रपतीय निर्वाचनको दोस्रो चरणमा वर्तमान राष्ट्रपति लुइज इनासियो लुला दा सिल्भाले लिबरल पार्टीका सिनेटर फ्लाभियो बोल्सोनारोलाई पराजित गर्नुभएको छ। पहिलो चरणमा अग्रता लिएका बोल्सोनारोले भने हार स्वीकार गर्नुभएको छैन। रोयटर्सका अनुसार उहाँ मंगलबार ब्राजिल छाडेर अमेरिका जानुभएको छ र अमेरिकी विदेश विभागले उहाँ तथा परिवारलाई भिसा दिने जनाएको छ।

उहाँकी श्रीमती र दुई छोरी पनि अमेरिका जाने तयारीमा रहेको उल्लेख छ। अमेरिकी राष्ट्रपति डोनाल्ड ट्रम्पले बुधबार जोइन्ट बेस एन्ड्र्युजमा पत्रकारसँग कुरा गर्दै बोल्सोनारोलाई अमेरिका आउन स्वीकृति दिने बताउनुभएको छ। निर्वाचन अनौठो भएको टिप्पणी गर्दै उहाँले आफूले कुनै पक्ष नलिएको स्पष्ट पार्नुभएको छ।

राष्ट्रपति लुलाले भने अमेरिकाले बोल्सोनारो परिवारलाई राजनीतिक सहयोग गरेको आरोप लगाउँदै आउनुभएको छ। सन् १९४५ अक्टोबरमा उत्तरपूर्वी ब्राजिलको गरिब ग्रामीण परिवारमा जन्मिनुभएका लुला ट्रेड युनियन नेता हुँदै सन् १९८० मा वर्कर्स पार्टीका सहसंस्थापक बन्नुभएको थियो। उहाँ सन् २००२, २००६ र २०२२ मा राष्ट्रपति निर्वाचित हुनुभएको थियो।

गरिब परिवारलाई नगद सहायता दिने 'बोल्सा फामिलिया' कार्यक्रम उहाँको प्रमुख नीति मानिन्छ। विदेश नीतिमा उहाँले ब्रिक्स राष्ट्रबीचको सहकार्य र चीनसँगको सम्बन्धलाई प्राथमिकता दिँदै आउनुभएको छ। लुलाले सन् २०२७ जनवरी ५ देखि चौथो चारवर्षे कार्यकाल सुरु गर्ने कार्यक्रम छ।