बेलायतले विद्यार्थी भिसाका लागि जीवनयापन खर्चको रकम बढायो

बेलायतले अन्तर्राष्ट्रिय विद्यार्थीले भिसा आवेदन गर्दा देखाउनुपर्ने जीवनयापन खर्चको रकम नोभेम्बर ३० देखि बढाउने भएको छ। बेलायती गृह मन्त्रालयको नयाँ व्यवस्थाअनुसार लन्डनमा पढ्ने विद्यार्थीले मासिक करिब १,५७० पाउन्ड देखाउनुपर्नेछ, जुन हाल १,५२९ पाउन्ड छ। नेपाल राष्ट्र बैंकले आज तोकेको पाउन्डको बिक्री दर २०३ रुपैयाँ ४ पैसाका आधारमा यो रकम करिब ३ लाख १९ हजार रुपैयाँ हुन्छ।

बढीमा नौ महिनाका लागि लन्डनमा कुल करिब १४,१३० पाउन्ड अर्थात् झन्डै २८ लाख ७० हजार रुपैयाँ देखाउनुपर्नेछ। लन्डनबाहिर पढ्नेका लागि मासिक रकम करिब १,१७१ बाट १,२०३ पाउन्ड पुग्नेछ, जुन करिब २ लाख ४४ हजार रुपैयाँ बराबर हो। यो रकम विश्वविद्यालयको शिक्षण शुल्कभन्दा छुट्टै हो र भिसा शुल्क तथा इमिग्रेसन हेल्थ सरचार्ज पनि अलग्गै तिर्नुपर्छ।

युनिभर्सिटी अफ चेस्टरका प्राध्यापक पदम सिम्खडाका अनुसार बेलायतमा विद्यार्थी पठाउने मुलुकमा नेपाल भारत, चीन, पाकिस्तान र नाइजेरियापछि पाँचौँ स्थानमा छ। उहाँका अनुसार सन् २०२५ डिसेम्बरसम्मको एक वर्षमा करिब १९ हजार ५ सय नेपाली विद्यार्थीले अध्ययन भिसा पाएका थिए। सिम्खडाले सन् २०२१–२२ मा अन्तर्राष्ट्रिय विद्यार्थीले बेलायती अर्थतन्त्रमा करिब ४१ अर्ब ९० करोड पाउन्ड योगदान गरेको बताउनुभएको छ।

तथ्याङ्कअनुसार २०२४–२५ शैक्षिक वर्षमा बेलायतमा झन्डै ६ लाख ८६ हजार अन्तर्राष्ट्रिय विद्यार्थी अध्ययनरत थिए।