न्युजिल्यान्डका नेपालीलाई राहदानी नवीकरण गर्न अस्ट्रेलिया जानुपर्ने बाध्यता

न्युजिल्यान्डमा बस्ने नेपालीले राहदानी नवीकरण र अन्य कन्सुलर सेवाका लागि अस्ट्रेलिया वा नेपालसम्म पुग्नुपरेको गुनासो गरेका छन्। न्युजिल्यान्डमा नेपाली दूतावास नहुनु र राहदानी छपाइको प्राविधिक समस्या लम्बिनु यसको कारण भनिएको छ। गैरआवासीय नेपाली संघ न्युजिल्यान्डका अध्यक्ष डा.

अच्युत अर्यालका अनुसार विशेषगरी विद्यार्थीबाट यस्ता गुनासो धेरै आइरहेका छन्। सेवा लिन विदेश धाउनुपर्दा समय र खर्च दुवै बढेको र विद्यार्थीको दैनिक जीवन र योजनामा असर परेको उहाँले बताउनुभएको छ। न्युजिल्यान्डस्थित नेपाली समुदायका अगुवाले यस समस्यातर्फ नेपाल सरकारको ध्यानाकर्षण गराएका छन्।

क्यानबेराको नेपाली दूतावासकी कार्यवाहक राजदूत तारा गौतमका अनुसार राहदानी छपाइको नयाँ ठेक्का एक जर्मन कम्पनीलाई दिइएको छ र प्रणाली सञ्चालनमा आउन ३ महिना लाग्नेछ। आगामी वर्षको सुरुदेखि वर्षमा कम्तीमा २ पटक न्युजिल्यान्डमै घुम्ती सेवा चलाएर कन्सुलर सेवा दिने दूतावासको योजना छ।