जातीय छुवाछुत र महिला–बालबालिकामाथिको हिंसा रोक्न मन्त्री बादी र आईजीपी कार्कीबीच छलफल

महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सिता बादी र प्रहरी महानिरीक्षक दानबहादुर कार्कीबीच जातीय छुवाछुत र हिंसा नियन्त्रणबारे छलफल भएको छ। मन्त्रालयमा भएको भेटमा जातीय भेदभावका घटनामा प्रभावकारी अनुसन्धान, कानुनी कारबाही, पीडितको संरक्षण र उजुरीको छिटो सम्बोधनलाई प्राथमिकता दिइएको मन्त्रीको सचिवालयले जनाएको छ। यस्ता घटनामा संलग्नलाई प्रचलित कानुनअनुसार कडा कारबाही गर्नुपर्नेमा जोड दिइएको छ।

यसका लागि नेपाल प्रहरीको दलित सहायता कक्षलाई थप सक्रिय बनाउने विषय उठेको छ। उजुरी संवेदनशील ढंगले लिने र अनुसन्धान तथा अभियोजन छिटो अघि बढाउनुपर्ने कुरामा पनि जोड दिइएको छ। महिला र बालबालिकामाथि हुने हिंसा नियन्त्रण र जोखिममा रहेका बालबालिकाको संरक्षणबारे पनि छलफल भएको छ।

सीमापार बालबालिकाको ओसारपसार र बेचबिखनको जोखिम घटाउने विषय पनि छलफलमा समेटिएको छ। सीमान्तकृत समुदायका गुनासो सम्बोधन गर्ने र उनीहरूको न्यायमा पहुँच प्रभावकारी बनाउनेबारे पनि कुरा भएको छ। ज्येष्ठ नागरिक, अपाङ्गता भएका व्यक्ति र लैङ्गिक तथा यौनिक अल्पसङ्ख्यकको अधिकार संरक्षण र सुरक्षाको विषय पनि भेटमा उठेको छ।