सामुदायिक विद्यालयमध्ये झन्डै ३० प्रतिशतमा मात्र आईसीटी प्रयोगशाला

देशभर सञ्चालित सामुदायिक विद्यालयमध्ये झन्डै ३० प्रतिशतमा मात्र सूचना प्रविधि प्रयोगशाला स्थापना भएको छ। शिक्षा तथा खेलकुद मन्त्रालयको २०८२/०८३ को वार्षिक प्रतिवेदनमा यो विवरण उल्लेख छ। अर्थात्, बाँकी करिब ७० प्रतिशत सामुदायिक विद्यालयमा अझै आईसीटी प्रयोगशाला छैन।

विसं २०७७ देखि सञ्चालित राष्ट्रपति शैक्षिक सुधार कार्यक्रमअन्तर्गत करिब ४ हजार ६०८ विद्यालयमा यस्ता प्रयोगशाला निर्माण भएका छन्। इन्टरनेट सुविधा भने करिब ८५ प्रतिशत सामुदायिक विद्यालयमा पुगेको प्रतिवेदनमा उल्लेख छ। वैकल्पिक स्रोतबाट विद्युत् पहुँच पुगेका विद्यालय झन्डै ७० प्रतिशत रहेका छन्।

मन्त्रालयका अनुसार देशभर करिब ३५ हजार ९५१ विद्यालय सञ्चालनमा छन्। तीमध्ये धार्मिक प्रकृतिका विद्यालयसमेत गरी करिब २७ हजार १० सामुदायिक विद्यालय छन्। विद्यालय सङ्ख्याको यो तथ्याङ्क पछिल्लो वर्षको हो।

मन्त्रालयले भौतिक पूर्वाधार र प्रविधिको पहुँच बढ्दा पढाइको गुणस्तर उक्सिन मद्दत पुगेको जनाएको छ।