पोखराको फेवा किनारमा पहिलो दसैँ पर्यटन महोत्सव, विदेशीले लगाए टीका

पोखराको लेकसाइडस्थित फेवाताल किनारमा आइतबार पहिलोपटक दसैँ पर्यटन तथा सांस्कृतिक महोत्सव आयोजना गरिएको छ। महिला पर्यटन व्यवसायी मञ्च, ओटेफले दसैँको अन्तिम दिन कोजाग्रत पूर्णिमामा वाराही खेलमैदानमा यो कार्यक्रम गरेको हो। महोत्सवमा दुई दर्जनभन्दा बढी विदेशी पर्यटक र सयौँ स्वदेशीले नेपाली परम्पराअनुसार टीका, जमरा र दक्षिणा ग्रहण गरेका छन्।

सहभागीलाई दसैँका परिकार, पिङ र मौलिक सांस्कृतिक प्रस्तुतिमार्फत चाडको अनुभव गराइएको छ। पोखरा महानगरपालिकाका प्रमुख धनराज आचार्यलगायत अतिथि र ज्येष्ठ नागरिकले सहभागीलाई टीका लगाएर आशीर्वाद दिनुभएको छ। प्रमुख आचार्यले धेरै गर्मी वा धेरै जाडो नहुने भएकाले पोखरा सबै मौसममा घुम्न उपयुक्त गन्तव्य भएको बताउनुभएको छ।

हिमाल, ताल र साहसिक खेलका लागि चिनिएको पोखराले अब चाडपर्वमार्फत पनि पर्यटक तान्ने प्रयास थालेको छ। अन्नपूर्ण फेरो पदयात्रा सकेर पोखरा आइपुगेकी आयरल्यान्डकी पर्यटक इथाले अस्ट्रेलियामा नेपालीसँग काम गर्दा सुनेको दसैँ पहिलोपटक नजिकबाट अनुभव गर्न पाएको बताउनुभएको छ। उहाँले सबै जना एकजुट भएर मनाउने यो पर्व निकै सुन्दर लागेको बताउनुभएको छ।