भारतमा जियो प्लेटफर्म्सको आईपीओमा रेकर्ड आवेदन

भारतको जियो प्लेटफर्म्सको प्राथमिक सेयर निष्कासन अर्थात् आईपीओमा भारतको इतिहासमै सबैभन्दा धेरै माग परेको छ। रिलायन्स इन्डस्ट्रिजको स्वामित्वमा रहेको यो दूरसञ्चार तथा डिजिटल कम्पनीले प्रतिसेयर १ हजार ६५ देखि १ हजार ११९ भारतीय रुपैयाँसम्मको मूल्य तोकेको थियो। निष्कासनको आकार ३० हजार २१३ करोड भारतीय रुपैयाँ छ र यसमा करिब २७ करोड कित्ता नयाँ सेयर छन्।

भारतीय सञ्चारमाध्यमका अनुसार यो भारतको कर्पोरेट इतिहासकै सबैभन्दा ठूलो आईपीओ हो। कुल निष्कासनमा झन्डै २२ गुणा बढी आवेदन परेको छ, जसको रकम करिब ७७ अर्ब अमेरिकी डलर बराबर हुन्छ। १ करोडभन्दा बढी व्यक्तिगत लगानीकर्ताले आवेदन दिएका छन्।

यति धेरै व्यक्तिगत आवेदन पाउने यो विश्वकै पहिलो कम्पनी बनेको बताइएको छ। यसअघि यो कीर्तिमान भारतकै वारी इनर्जीजको नाममा थियो, जसले करिब ९७ लाख ३० हजार आवेदन पाएको थियो। सन् २००८ मा अनिल अम्बानीको रिलायन्स पावरले बनाएको मागको कीर्तिमान पनि यसले तोडेको छ।

मुकेश अम्बानी समूहले करिब दुई दशकपछि ल्याएको यो पहिलो आईपीओ हो। कम्पनीको बजार मूल्याङ्कन करिब १०८ अर्ब अमेरिकी डलर पुग्ने अनुमान छ। कम्पनीको सेयर आगामी बुधबारदेखि दोस्रो बजारमा कारोबार हुने जनाइएको छ।