फ्रान्सका प्रदर्शनमा दुई दिनमा १ हजार ३ सयभन्दा बढी पक्राउ

फ्रान्समा महँगी र विद्यालयको खस्कँदो अवस्थाविरुद्ध भइरहेका प्रदर्शनमा शुक्रबार र शनिबार गरी करिब १ हजार ३ सय जना पक्राउ परेको आन्तरिक मन्त्रालयले जनाएको छ। मन्त्रालयका अनुसार शनिबार देशभर करिब ४ लाख १० हजार मानिस प्रदर्शनमा सहभागी भएका छन्। आयोजक ट्रेड युनियनहरूले भने सहभागी सङ्ख्या करिब ८ लाख पुगेको दाबी गरेका छन्।

प्रदर्शन नियन्त्रण गर्न सरकारले देशभर करिब ७० हजार सुरक्षाकर्मी परिचालन गरेको छ। राजधानी पेरिससहित धेरै सहरमा प्रहरीले भीड तितरबितर पार्न अश्रुग्यास र पानीको फोहोरा प्रयोग गरेको छ। मार्सेलीमा प्रदर्शनकारीले सडकमा राखिएका अवरोधमा आगो लगाएका छन् भने बोर्डोमा एउटा पसलमा क्षति पुगेको छ।

मन्त्रालयका अनुसार शनिबार प्रहरीले करिब ७५ ठाउँमा लागेको आगो नियन्त्रण गरेको छ। गत साताजस्तो व्यापक दङ्गा र लुटपाट यसपटक रोकिएको अधिकारीहरूले जनाएका छन्। राष्ट्रपति इमानुएल म्याक्रोँले युनियनले आयोजना गरेका आधिकारिक प्रदर्शनलाई मात्र अनुमति दिने घोषणा गर्नुभएको छ।

म्याक्रोँको दोस्रो कार्यकाल सकिँदै गर्दा उत्तराधिकारी चुन्न आगामी अप्रिल र मेमा राष्ट्रपतिको निर्वाचन हुने कार्यक्रम छ।