दिल्लीमा नोभेम्बर १ देखि बीएस–६ मापदण्ड नपुगेका गाडी प्रवेश निषेध

भारतको राजधानी दिल्लीमा नोभेम्बर १ देखि बीएस–६ उत्सर्जन मापदण्ड पूरा नगर्ने बाहिरी सवारीसाधनको प्रवेशमा रोक लगाइने भएको छ। बीएस–६ भन्नाले भारत स्ट्यान्डर्ड ६ भन्ने बुझिन्छ। मुख्यमन्त्री रेखा गुप्ताले सार्वजनिक गर्नुभएको जाडोयामको प्रदूषण नियन्त्रण योजनाअनुसार यो प्रतिबन्ध २०२७ जनवरी ३१ सम्म लागू रहनेछ।

प्रतिबन्ध दिल्लीबाहिर दर्ता भएका र उक्त मापदण्ड नपुगेका गाडीमा मात्र लागू हुनेछ। विद्युतीय, सीएनजीबाट चल्ने र अत्यावश्यक सेवाका सवारीसाधनले भने छुट पाउनेछन्। समग्र शीतकालीन कार्ययोजना भने फेब्रुअरी २८ सम्म चल्नेछ।

योजनाअनुसार पेट्रोल पम्पमा ‘नो पीयूसी, नो फ्युल’ नियम पनि लागू हुनेछ। प्रदूषण नियन्त्रण प्रमाणपत्र अर्थात् पीयूसीको म्याद नाघेका गाडीले पेट्रोल, डिजेल, सीएनजी वा एलपीजी भराउन पाउने छैनन्।