अमेरिकी मध्यावधि चुनाव: ओबामाको ट्रम्पमाथि प्रहार

अमेरिकामा नोभेम्बर ३ मा हुने मध्यावधि निर्वाचनअघि पूर्वराष्ट्रपति बाराक ओबामा र राष्ट्रपति डोनाल्ड ट्रम्पबीच आरोप–प्रत्यारोप चर्किएको छ। रोयटर्सका अनुसार ओबामाले शनिबार ओहायोको क्लिभल्यान्ड र मिसिगनको डेट्रोइटमा डेमोक्रेटिक उम्मेदवारका पक्षमा चुनावी सभा सम्बोधन गर्नुभएको छ। उहाँले ट्रम्प प्रशासनमाथि भ्रष्टाचार, नीतिगत कमजोरी र अनावश्यक विषयमा ध्यान दिएको आरोप लगाउनुभएको छ।

ट्रम्प चुनाव जित्न जुनसुकै हदसम्म जाने र व्यक्तिगत जीवनका संवेदनशील विषयलाई समेत राजनीतिक हतियार बनाउने गरेको आरोप पनि ओबामाले लगाउनुभएको छ। ओहायोमा उहाँले रिपब्लिकन उम्मेदवार विवेक रामास्वामीको एउटा चुनावी विज्ञापनप्रति कडा आपत्ति जनाउनुभएको छ। मिसिगनमा सिनेटका डेमोक्रेटिक उम्मेदवार अब्दुल अल–सयदको समर्थनमा बोल्दै ओबामाले सरकारलाई जवाफदेही बनाउन 'सर्किट ब्रेकर' चलाउनुपर्ने बताउनुभएको छ।

ओबामाले आफ्नो कार्यकालको इरान आणविक सम्झौताले एउटा पनि क्षेप्यास्त्र नचलाई इरानको आणविक कार्यक्रम नियन्त्रणमा राखेको दाबी गर्नुभएको छ। जवाफमा ट्रम्पले सामाजिक सञ्जाल 'ट्रुथ सोसल' मा ओबामालाई अक्षम राष्ट्रपति भन्दै उहाँले इरानलाई अर्बौँ डलर दिएको आरोप लगाउनुभएको छ। ट्रम्पका अनुसार त्यही रकमले इरानलाई आणविक हतियारतर्फ अघि बढ्ने मौका दिएको हो।