कोजाग्रत पूर्णिमासँगै दसैँ सकियो: जानकी मन्दिरमा पाहुर, राष्ट्रपति नवदुर्गामा, मोहनी नखः

कोजाग्रत पूर्णिमासँगै आइतबार यस वर्षको बडादसैँ औपचारिक रूपमा सकिएको छ। विजयादशमीका दिन कात्तिक ४ गतेदेखि सुरु भएको टीका र जमरा लगाउने क्रम आजै टुङ्गिँदैछ। जनकपुरधामको जानकी मन्दिरमा राम र सीताको चुमाओन अनुष्ठानका लागि महोत्तरीको पिपरा गाउँपालिकास्थित रतौलीबाट १०८ भार पाहुर भित्र्याइएको छ।

रतौलीको ठाकुर परिवारले १४२ वर्षदेखि यो परम्परा धान्दै आएको छ। पाहुरमा पान, मखान, लड्डु, चामल, दाल, तरकारी र देवदेवीका लागि वस्त्र समावेश छन्। परिवारका सदस्य नवीन ठाकुरले यो परम्परा कुनै हालतमा टुट्न नदिने प्रतिबद्धता व्यक्त गर्नुभएको छ।

मन्दिरका उत्तराधिकारी महन्थ रामरोशन दास वैष्णवका अनुसार यस अवसरमा विशेष भजनकीर्तन र मिथिलाको मौलिक हास्यपरिहास कार्यक्रम पनि राखिएको छ। राष्ट्रपतिको सचिवालयका अनुसार राष्ट्रपति रामचन्द्र पौडेलको अपराह्न ३ बजे भक्तपुरको नवदुर्गा मन्दिरमा कोजाग्रत पूजा गर्ने कार्यक्रम छ। स्याङ्जाको बिरुवा गाउँपालिकाले मनकामना मन्दिरमा लाग्ने पूर्णिमा मेलाका अवसरमा सोमबार सार्वजनिक बिदा दिएको छ।

काठमाडौँको वसन्तपुरस्थित श्रीखण्ड तरुमुल महाविहारका सदस्यले जीवित देवदेवी गणेश, भैरव र कुमारीबाट टीका थापेर मोहनी नखः मनाएका छन्। दसैँ मनाउन बाहिरिएकाहरू फर्किन थालेपछि काठमाडौँ उपत्यकाका सडक र सार्वजनिक यातायातमा चहलपहल बढेको छ। यसैसँगै तुलसी पूजा, कार्तिक स्नान र आकाशदीप दानजस्ता परम्परा तथा भक्तपुरको नवदुर्गा वनयात्रा सुरु हुँदैछन्।