पोखरा विमानस्थलमा कम दृश्यतामा पनि अवतरण सहज बनाउन आरएनपी–एआर प्रणाली लागू गर्ने प्रक्रिया अघि

पोखरा अन्तर्राष्ट्रिय विमानस्थलमा प्रतिकूल मौसम र कम दृश्यताका कारण हुने उडान अवरोध घटाउन आधुनिक हवाई मार्गनिर्देशन प्रणाली लागू गर्ने प्रक्रिया अघि बढेको छ।

नेपाल नागरिक उड्डयन प्राधिकरणले विमानस्थलमा आवश्यक नेभिगेसन कार्यसम्पादन तथा पूर्वस्वीकृति अवतरण प्रक्रिया अर्थात् आरएनपी–एआर (RNP-AR) लागू गर्न प्राविधिक अध्ययन अघि बढाएको हो।

यो प्रणाली लागू भएपछि कम दृश्यताका कारण उडान अर्को विमानस्थलमा मोड्नुपर्ने (डाइभर्ट) र उडान रद्द हुने समस्या न्यूनीकरण हुने अपेक्षा गरिएको छ।

प्रारम्भिक अध्ययन पूरा भइसकेको छ। तर विस्तृत डिजाइन र सुरक्षा मूल्याङ्कनलगायतका काम अझै बाँकी रहेको नेपाल लाइभले जनाएको छ।