वर्ग संरचना बदलिए पनि जातीय विभेदका अवशेष कायमै: खतिवडा

पूर्वअर्थमन्त्री डा. युवराज खतिवडाले नेपाली समाजमा वर्ग संरचना फेरिँदै गए पनि जातीय र सामाजिक विभेदका अवशेष अझै बाँकी रहेको बताउनुभएको छ। बिहीबार च्यासलस्थित नेकपा एमालेको केन्द्रीय कार्यालयमा पार्टीको नीति अध्ययन तथा अनुसन्धान प्रतिष्ठानले आफ्नो वेबसाइट सार्वजनिक गरेको कार्यक्रममा उहाँ बोल्नुभएको हो।

वर्ग संरचनाको विश्लेषण गर्दा जातीय र लैङ्गिक विभेदलाई पनि समेट्नुपर्ने उहाँको धारणा छ। उहाँका अनुसार देशको राजनीतिक, आर्थिक र सांस्कृतिक बदलावसँगै पुराना वर्गहरूको स्वरूप फेरिँदै छ र नयाँ वर्ग जन्मिँदै छन्। जात र वर्ग फरक पक्ष भए पनि नेपालमा यी दुईबीच सीधा सम्बन्ध रहेकाले समाज अध्ययनमा दुवैलाई आधार मान्नुपर्ने उहाँले बताउनुभएको छ।

राज्यबाट पाइने संरक्षण, अवसर र सहुलियत आर्थिक अवस्थाभन्दा जातजाति र समुदायका आधारमा तय हुने प्रवृत्तिप्रति उहाँले चिन्ता जनाउनुभएको छ। यस्तो प्रवृत्तिले निम्न वर्गलाई मिल्ने संरक्षण र सहयोग कमजोर हुँदै जाने जोखिम रहेको उहाँको भनाइ छ।