दसैँको रौनकबीच भक्तपुरका किसानलाई धान भित्र्याउने चटारो

दसैँको रमझमका बीच भक्तपुरका किसानहरू खेतमा पाकेको धान काटेर घर भित्र्याउन व्यस्त छन्। बजारमा किनमेलको भीड बढिरहेका बेला किसानहरू वर्षभरि खान पुग्ने अन्न जोगाउन खेतमा खटिएका छन्। उनीहरू धान काट्ने, थ्रेसरले दाना छुटाउने र बोरामा भरेर भकारीमा राख्ने काममा लागेका छन्।

धेरै किसान छिमेकीसँग अर्मपर्मको परम्पराअनुसार एकअर्काको खेतमा पालो मिलाएर काम गरिरहेका छन्। यस वर्ष दसैँ र धान पाक्ने समय एकैसाथ परेकाले किसानलाई दोहोरो चटारो परेको छ। परिवारदेखि छिमेकीसम्म मिलेर खेतमा खटिँदा ग्रामीण बस्तीमा चाडको चहलपहलसँगै खेतीको व्यस्तता पनि बढेको छ।

जल तथा मौसम विज्ञान विभागका अनुसार आज काठमाडौँमा आंशिक बदली छ र वर्षाको सम्भावना देखिएको छैन। भोलि भने बागमतीसहित अन्य प्रदेशका पहाडी भू-भागका एक–दुई स्थानमा मेघगर्जन र चट्याङसहित मध्यम वर्षाको सम्भावना रहेको विभागले जनाएको छ।