रसुवा बाढी: प्रभावित क्षेत्रको पुनरुत्थानका लागि ठोस योजना ल्याउन राष्ट्रिय सभाका सांसदको माग

राष्ट्रिय सभाका सांसदहरूले बाढीले थलिएका क्षेत्रलाई पुनः उठाउन र प्रकृतिमा आधारित पर्यटन बढाउन सरकारसँग ठोस योजना मागेका छन्। सिंहदरबारमा बिहीबार बसेको उक्त सभाको विकास, आर्थिक मामिला तथा सुशासन समितिको बैठकमा उनीहरूले यो माग उठाएका हुन्। रसुवाको भोटेकोशीमा आएको बाढीले बिगारेका जलविद्युत् आयोजनासहितका पूर्वाधार पुनः बनाउन संघ, प्रदेश र स्थानीय तह मिलेर काम गर्नुपर्ने सांसदहरूको भनाइ छ।

नेकपाकी सांसद उर्मिला अर्यालले जलवायु परिवर्तन र बाढीका चुनौती सामना गर्न दीर्घकालीन योजना चाहिने बताउनुभएको छ। नेपालले पहल गरेर जलवायु पुनरुत्थानको अलग मोडल र विश्वव्यापी मञ्च बनाउनुपर्नेमा उहाँले जोड दिनुभयो। खेतीको परम्परागत प्रणाली, सिँचाइ, जग्गा व्यवस्थापन र बस्ती विकासलाई व्यवस्थित बनाउनुपर्ने पनि उहाँको भनाइ छ।

अन्य सांसदहरूले जलवायु परिवर्तनको असर घटाउन, वित्तीय व्यवस्थापन गर्न र मानव–वन्यजन्तु द्वन्द्व नियन्त्रण गर्न ध्यान दिनुपर्ने सुझाव दिएका छन्।