चाडपर्वको मागसँगै अण्डाको होलसेल मूल्य बढ्यो, खुद्रा मूल्य यथावत

चाडपर्व र जाडो सुरु भएसँगै माग बढेपछि नेपाल लेयर्स कुखुरापालक सङ्घले अण्डाको होलसेल समर्थन मूल्य बढाएको छ, तर उपभोक्ताले तिर्ने खुद्रा मूल्य यथावत् राखिएको छ। सङ्घले बिहीबार पोखरामा बसेको बैठकबाट नयाँ मूल्य तोकेको हो। ६ कात्तिकमा काठमाडौँमा बसेको बैठकले तय गरेको मूल्य छ दिनमै परिमार्जन गरिएको सङ्घका अध्यक्ष विनोद पोखरेलले बताउनुभएको छ।

पेटीको तौलका आधारमा एक्सएल, ठूलो, मिडियम र सानो गरी चार वर्गमा मूल्य तोकिएको छ। सङ्घका अनुसार एक्सएल, ठूलो र मिडियम अण्डाको मूल्य प्रतिपेटी करिब २०० रुपैयाँ र सानो अण्डाको करिब १०० रुपैयाँ बढेको छ। १४.५ देखि १४.८ किलो तौल हुने एक्सएल वर्गको पेटी करिब ३ हजार ७०० बाट बढेर ३ हजार ९०० रुपैयाँ पुगेको छ।

ठूलो वर्ग, अर्थात् १३.५ देखि १३.८ किलोको पेटी करिब ३ हजार ६०० बाट ३ हजार ८०० रुपैयाँ पुगेको छ। मिडियम वर्गमा १२.५ देखि १२.८ किलोको पेटी पर्छ, जसको मूल्य करिब ३ हजार ५०० बाट ३ हजार ७०० रुपैयाँ पुगेको छ।