विवादित अडियो: सांसद खगेन्द्र सुनारको रास्वपालाई इन्कारी पत्र

राष्ट्रिय स्वतन्त्र पार्टी, रास्वपाका सांसद खगेन्द्र सुनारले एक महिलासँगको भनिएको विवादित अडियो संवादमा आफ्नो आवाज नभएको दाबी गर्नुभएको छ। यही दाबीसहित उहाँले पार्टीको अनुशासन आयोगमा लिखित इन्कारी पत्र बुझाउनुभएको छ। आयोगका उपप्रमुख तथा छानबिन समितिका संयोजक अधिवक्ता हरिचन्द्र भट्टराईका अनुसार पत्रमा सुनारले सामाजिक सञ्जालमा राखेकै धारणा मोटामोटी दोहोर्‍याउनुभएको छ।

सुनारले यसअघि नै उक्त अडियो एआईलगायतका प्रविधिबाट तयार पारिएको दाबी गर्नुभएको थियो। प्रहरीभित्रको भ्रष्टाचारको विषय उठाएपछि आफूलाई निशाना बनाइएको उहाँको भनाइ छ। अडियो सार्वजनिक भएपछि रास्वपाले यस विषयमा आन्तरिक छानबिन थालेको थियो।

इन्कारीपछि समितिले अडियो साँचो हो वा होइन भनी जाँच्ने र स्वतन्त्र प्रमाण जुटाउने कामलाई अघि सारेको छ। यसका लागि समितिले जनआस्थासँग सम्पादनअघिको अडियो र न्युज २४ सँग अन्तर्वार्ताको अडियो मागेको छ।