रोजगारी नै पहिलो समस्या: कुलमान घिसिङ

उज्यालो नेपाल पार्टीका अध्यक्ष कुलमान घिसिङले देशको पहिलो समस्या रोजगारी भएको बताउनुभएको छ। रामेछापको उमाकुण्ड गाउँपालिकाको केन्द्र प्रीतिमा पार्टीको गाउँपालिका कमिटी पुनर्गठनका लागि कार्यक्रम राखिएको थियो। त्यहाँ उहाँले रोजगारी समस्या समाधानको मार्गचित्र पार्टीले तयार पारेको जानकारी दिनुभएको छ।

घिसिङका अनुसार पार्टीले हरित क्रान्तिमार्फत देशलाई वातावरण, अर्थतन्त्र र समाज तीनै हिसाबले समुन्नत बनाउने लक्ष्य लिएको छ। नेपालमा धेरै वादका कुरा भए पनि आर्थिक प्रगति हुन नसकेको उहाँको टिप्पणी छ। पार्टीको वैचारिक बाटो आर्थिक रूपान्तरणको मध्यमार्ग भएको र कुनै पनि अतिवाद स्वीकार्य नभएको उहाँको भनाइ छ।

सबैलाई समेटेर देशको उन्नति गर्ने उद्देश्यले पार्टी अघि बढेको घिसिङले बताउनुभएको छ।