कांग्रेसमा पहिलोपटक वरिष्ठ उपसभापति, नीति प्रतिष्ठानको नेतृत्व पनि

नेपाली कांग्रेसको इतिहासमा पहिलोपटक वरिष्ठ उपसभापति पद सिर्जना भएको छ र त्यस पदमा विश्वप्रकाश शर्मा निर्विरोध निर्वाचित हुनुभएको छ। पार्टीको १५औँ महाधिवेशनले पारित गरेको संशोधित विधानअनुसार वरिष्ठ उपसभापतिले नीति, अनुसन्धान तथा प्रशिक्षण प्रतिष्ठानको नेतृत्व गर्नेछन्। यसअघि सभापतिले तोकेको उपसभापतिले प्रतिष्ठान सम्हाल्ने व्यवस्था थियो।

त्यसैअनुसार पूर्वसभापति शेरबहादुर देउवाले तत्कालीन उपसभापति पूर्णबहादुर खड्कालाई र सभापति गगन थापाले विशेष महाधिवेशनपछि शर्मालाई संयोजक बनाएका थिए। विशेष महाधिवेशनबाट बनेको समितिमा शर्मा र पुष्पा भुसाल दुई उपसभापति हुनुहुन्थ्यो। नयाँ व्यवस्थाले वरिष्ठ उपसभापतिलाई सभापतिको अनुपस्थितिमा बैठक चलाउने र सभापतिले तोकेमा कार्यवाहक सभापतिको जिम्मेवारी पाउने अधिकार दिएको छ।

केन्द्रीय कार्यालय सञ्चालनमा समन्वयको भूमिका पनि वरिष्ठ उपसभापतिलाई दिइएको छ, तर दैनिक काम महामन्त्रीकै मातहत रहनेछ। पहिलेको विधानमा केन्द्रीय कार्यालय महामन्त्रीहरूकै मातहत चल्थ्यो, र तत्कालीन महामन्त्री गगन थापा र शर्माले त्यही हैसियतमा विशेष महाधिवेशन बोलाएका थिए। विधानमा वरिष्ठ उपसभापतिसहित पाँच उपसभापतिको प्रावधान छ।

अन्य उपसभापतिमा पुष्पा भुसाल, डा. चन्द्र भण्डारी, मधु आचार्य र विनोद चौधरी निर्वाचित हुनुभएको छ। विधान संशोधन मस्यौदा समितिको संयोजक नवनिर्वाचित महामन्त्री प्रदीप पौडेल हुनुहुन्थ्यो।

समितिका सदस्य जीवन परियार र महामन्त्री उदय शमशेर राणाका अनुसार प्रस्ताव पारित भए पनि विधानको अन्तिम प्रति अझै तयार भइसकेको छैन।