श्रम इजाजत लिने विदेशीमा चिनियाँ नागरिक पहिलो

नेपालमा काम गर्न श्रम इजाजत लिने विदेशीमध्ये चिनियाँ नागरिक सबैभन्दा धेरै छन्। श्रम तथा व्यवसायजन्य सुरक्षा विभागको तथ्याङ्कअनुसार आर्थिक वर्ष २०८२/०८३ मा इजाजत पाउने विदेशीमध्ये करिब ६६ प्रतिशत चीनका छन्। विभागका अनुसार सो वर्ष ६५ देशका करिब २ हजार ४ सय जनाले इजाजत लिएकामा झन्डै १ हजार ६ सय जना चिनियाँ छन्।

दोस्रो स्थानमा ब्रिटेन, तेस्रोमा अमेरिका र चौथोमा दक्षिण कोरिया छन्, जसका क्रमशः करिब ९६, ९१ र ८७ जना छन्। जापानका करिब ७० र भारतका करिब ६५ जनाले पनि इजाजत लिएका छन्। इजाजत लिनेमा अधिकांश पुरुष छन्।

विभागका महानिर्देशक चक्रपाणि पाण्डेका अनुसार जलविद्युत् आयोजना र सुरुङ निर्माणमा चिनियाँ कम्पनी संलग्न भएकाले त्यहाँका नागरिक पनि धेरै आएका हुन्। भाषा पढाउने, डाक्टर, इन्जिनियर र स्वयंसेवकले पनि इजाजत लिने गरेको उहाँले बताउनुभएको छ। आप्रवासन विज्ञ जीवन बानियाँका अनुसार द्विपक्षीय सन्धिका कारण भारतीयलाई इजाजत अनिवार्य नभएकाले नेपालमा काम गर्ने भारतीयको वास्तविक सङ्ख्या योभन्दा बढी हुनुपर्छ।

चिनियाँ ठेकेदारले पुल, सडक र आफ्नो लगानीका आयोजनामा आफ्नै कामदारलाई क्याम्पमा राखेर काम गराउने अभ्यास पुरानो भएको उहाँको भनाइ छ। नेपाली कामदार सङ्गठित भई हक माग्न सक्ने भएकाले पनि विदेशी कम्पनीले आफ्नै देशका कामदार रोज्ने गरेको हुन सक्ने उहाँले औँल्याउनुभएको छ।