बैतडीमा ४.२ म्याग्निच्युडको भूकम्प

बैतडीलाई केन्द्रबिन्दु बनाएर आज कात्तिक ८ गते आइतबार दिउँसो ४ दशमलव २ म्याग्निच्युडको भूकम्प गएको छ। राष्ट्रिय भूकम्प मापन तथा अनुसन्धान केन्द्रका भूकम्पविद् राजेश शर्माका अनुसार कम्पन दिउँसो १ बजेर ६ मिनेटमा भएको हो र यसको केन्द्रबिन्दु जिल्लाको ऐरीगाउँमा छ। सुर्खेतस्थित भूकम्प मापन केन्द्रले भने केन्द्रबिन्दु अरिगाउँ आसपास रहेको र मात्रा स्थानीय म्याग्निच्युड ४ दशमलव २ रहेको जनाएको छ।

स्थानीय विवरणअनुसार केन्द्रबिन्दु नेपाल–भारत सीमानजिकको डिलासैनी गाउँपालिका–३, रुद्रेश्वर क्षेत्रमा पर्छ। केन्द्रबिन्दु वरपरका गाउँसहित बैतडी र छिमेकी दार्चुला जिल्लाका बासिन्दाले धक्का महसुस गरेका छन्। बैतडीका दुर्गम बस्तीमा पनि कम्पन अनुभव गरिएको छ।

डिलासैनी गाउँपालिकाका अध्यक्ष सन्तोष जोशीले भूकम्पबाट कुनै भौतिक क्षति भएको विवरण अहिलेसम्म नआएको बताउनुभएको छ। यसअघि असोज २१ गते राति बाजुरा केन्द्रबिन्दु भएर ४ दशमलव १ म्याग्निच्युडको भूकम्प गएको थियो। त्यसको एक दिनअघि असोज २० गते दार्चुलामा ५ दशमलव १ म्याग्निच्युडको अझ ठूलो भूकम्प गएको थियो।

भूकम्पविद्हरूले सुदूरपश्चिम प्रदेश भूकम्पको उच्च जोखिममा रहेको औँल्याएका छन्।