ढल्केबरमा ट्रमा सेन्टर: टेन्डर प्रक्रिया अघि बढेको मन्त्री मेहताको भनाइ

धनुषाको ढल्केबरमा बन्ने क्रिटिकल केयर तथा ट्रमा सेन्टरको टेन्डर प्रक्रिया अघि बढिसकेको स्वास्थ्य तथा खाद्य स्वच्छतामन्त्री निशा मेहताले बताउनुभएको छ। आइतबार प्रस्तावित निर्माणस्थलको स्थलगत अवलोकन गर्दै उहाँले स्वास्थ्य मन्त्रालयबाट हस्ताक्षर भएका टेन्डर कागजात पूर्वाधारसम्बन्धी निकायमा पठाइसकिएको जानकारी दिनुभएको छ। त्यो चरण पूरा भएपछि टेन्डर आह्वान गरी निर्माण सुरु गरिने उहाँको भनाइ छ।

आयोजना सरकारको बहुवर्षीय योजनामा परिसकेकाले ट्रमा सेन्टर बन्ने–नबन्नेमा अन्योल राख्नु नपर्ने मन्त्री मेहताले बताउनुभएको छ। निरीक्षणपछि निर्माणस्थल उपयुक्त देखिएको उहाँले उल्लेख गर्नुभएको छ। शिलान्यासको निश्चित मिति भन्न गाह्रो भए पनि त्यो चाँडै हुने उहाँको विश्वास छ।

सडक दुर्घटनामा परेकालाई नजिकै सेवा दिनु र काठमाडौं जानुपर्ने बाध्यता घटाउनु आयोजनाको उद्देश्य रहेको जनाइएको छ। अवलोकनमा सहभागी सत्तारुढ राष्ट्रिय स्वतन्त्र पार्टीका प्रतिनिधिसभा सदस्य राजकिशोर महतोले स्थानीयले लामो समयदेखि आश्वासन मात्र पाइरहेकाले भवन निर्माण सुरु भएपछि मात्र उनीहरू विश्वस्त हुने बताउनुभएको छ। उहाँले शिलान्यासको काम छिटो अघि बढाउन मन्त्रीसमक्ष आग्रह गर्नुभएको छ।