लगातारको वर्षाले त्रिवि क्रिकेट मैदान जलमग्न, एनपीएलका आजका दुवै खेल प्रभावित

बिहीबारदेखि लगातार परेको वर्षाका कारण नेपाल प्रिमियर लिग (एनपीएल) भइरहेको कीर्तिपुरस्थित त्रिवि क्रिकेट मैदान जलमग्न भएको छ। मैदानलाई त्रिपालले छोपिए पनि पानी त्रिपालभित्रै छिरेको छ।

एनपीएलको तेस्रो संस्करणअन्तर्गत शनिबार दुई खेल हुने तालिका छ। दिउँसो १२:३० बजे पहिलो खेलमा लुम्बिनी लायन्स र चितवन राइनोज भिड्ने तालिका छ। साँझ ५ बजे सुरु हुने दोस्रो खेलमा विराटनगर किङ्स र सुदूरपश्चिम रोयल्स आमनेसामने हुने तालिका छ।

काठमाडौँमा २४ घण्टाभन्दा बढी समयदेखि निरन्तर वर्षा भइरहेकाले दुवै खेल प्रभावित हुने निश्चितजस्तै भएको छ। शनिबार पनि वर्षा जारी रहेकाले निर्धारित समयमा खेल सञ्चालन हुने सम्भावना निकै कम देखिएको छ।