सुनकोशी–मरिन डाइभर्सन आयोजनाको नयाँ ठेक्का प्रक्रिया रद्द

सुनकोशी–मरिन डाइभर्सन बहुउद्देश्यीय आयोजनाको बाँध, विद्युत् गृह र सम्बन्धित संरचना निर्माणका लागि आह्वान गरिएको नयाँ ठेक्का प्रक्रिया रद्द भएको छ। आयोजनाले सिभिल, हाइड्रोमेकानिकल तथा सम्बन्धित संरचना निर्माणको ठेक्का रद्द गरेको सार्वजनिक सूचना जारी गरेको हो।

नयाँ ठेक्का प्रक्रिया अन्तिम चरणमा पुगेका बेला प्रधानमन्त्री कार्यालयले प्रहरी परिचालन गरेर आयोजना निर्देशक कृष्णप्रसाद रिजाल र जलस्रोत तथा सिँचाइ विभागका महानिर्देशक दिनेश रजौरियालाई काठमाडौं झिकाएको थियो। उनीहरूलाई झिकाइएको भोलिपल्ट ठेक्का रद्द गरिएको सेतोपाटीले जनाएको छ।

क्लिकमाण्डूका अनुसार ठेक्का रद्द गर्न नमानेको भन्दै प्रधानमन्त्री कार्यालयको निर्देशनमा ती अधिकारीलाई झिकाइएको थियो। बिजमाण्डूले प्रधानमन्त्री बालेन्द्र शाहको सचिवालयले महानिर्देशक रजौरियालाई प्रहरी नियन्त्रणमा लिन लगाएर ठेक्का रद्द गराएको उल्लेख गरेको छ।

प्रधानमन्त्री कार्यालयले आयोजनाको कामबारे चासो राख्दै यो कदम चालेको सेतोपाटीले जनाएको छ।