चिकित्सा शिक्षामा ४१८ सिट थप, सरकारी कलेजलाई प्राथमिकता, इन्टर्न भत्ताबारे कार्यदल

चिकित्सा शिक्षा आयोगले शैक्षिक सत्र २०८३/८४ का लागि चिकित्सा शिक्षाका विभिन्न कार्यक्रममा ४१८ सिट थप गरेको छ। प्रधानमन्त्री वालेन्द्र शाहको अध्यक्षतामा आज सिंहदरबारमा बसेको आयोगको २८औँ बैठकले कुल ९ हजार ६९१ सिट निर्धारण गरेको हो। सिट माग गर्दै स्वमूल्याङ्कन फाराम बुझाएका ९० शिक्षण संस्थामध्ये अनुगमन प्रतिवेदनका आधारमा ८४ संस्थाले मात्र सिट पाएका छन्।

आयोगका सदस्य सचिव हरिप्रसाद निरौलाका अनुसार एमबीबीएसतर्फ ११० सिट बढेका छन्। गेटास्थित सहिद दशरथ चन्द स्वास्थ्य विज्ञान विश्वविद्यालयले पहिलोपटक एमबीबीएसका ५० सिट पाएको छ। बीपी कोइराला स्वास्थ्य विज्ञान प्रतिष्ठान र नेपाली सेना स्वास्थ्य विज्ञान प्रतिष्ठानमा ३०–३० सिट थपिएका छन्।

बीएससी नर्सिङमा २१० र बीएमएसमा ९८ सिट थप भएका छन्। निजी मेडिकल कलेजको सिट सङ्ख्या गत वर्षकै राखिएको छ र थपिएका सबै सिट सरकारी तथा सार्वजनिक संस्थाले पाएका छन्। बैठकले एमबीबीएस र बीडीएस इन्टर्न चिकित्सकको निर्वाह भत्ताबारे कार्यदल बनाउने निर्णय पनि गरेको छ।

बैठकमा सहभागी एक सदस्यका अनुसार भने विषय र तहअनुसार कति सिट थपिए भन्ने विस्तृत विवरण बैठकमा प्रस्तुत गरिएको थिएन।