प्रहरी दिवस: प्रहरी अस्पताललाई मेडिकल कलेज बनाउने प्रधानमन्त्रीको घोषणा, वित्तीय अपराधविरुद्ध संयन्त्र

प्रधानमन्त्री वालेन्द्र शाहले नेपाल प्रहरी अस्पताललाई मेडिकल कलेजका रूपमा विकास गर्ने सरकारको योजना रहेको बताउनुभएको छ। ७१औँ प्रहरी दिवसका अवसरमा शुक्रबार दिएको शुभकामना सन्देशमा उहाँले प्रहरी कर्मचारी, आश्रित परिवार र आम नागरिकको स्वास्थ्य सेवालाई ध्यानमा राखेर यो योजना बनाइएको उल्लेख गर्नुभएको छ। काठमाडौँको नक्सालस्थित प्रहरी प्रधान कार्यालयमा भएको समारोहमा उक्त सन्देश प्रहरी महानिरीक्षक दानबहादुर कार्कीले पढेर सुनाउनुभएको थियो।

प्रधानमन्त्रीका अनुसार बढ्दो वित्तीय र साइबर अपराध नियन्त्रणका लागि प्रहरीसँगै राष्ट्र बैंक, इन्टरनेट तथा टेलिकम सेवा प्रदायक र डिजिटल वालेटलाई एकै ठाउँमा ल्याइँदै छ। यसबाट नागरिकका गुनासा थप प्रभावकारी रूपमा सम्बोधन गर्ने लक्ष्य राखिएको छ। एआई, एरियल सेक्युरिटी एन्ड सपोर्ट युनिट र इन्टिग्रेटेड एन्टिस्क्याम सेन्टर स्थापनाको तयारी भइरहेको पनि सन्देशमा उल्लेख छ।

सरकारले प्रहरीका लागि नीतिगत मार्गदर्शन, कानुनी सहजता, आधुनिक तालिम तथा पूर्वाधारलाई प्राथमिकतामा राखेको प्रधानमन्त्रीले बताउनुभएको छ। समारोहमा प्रहरी महानिरीक्षक कार्कीले एआई तथा एड्भान्स्ड एनालिटिक्स सेल र हवाई सुरक्षाअन्तर्गत ड्रोन तथा एन्टिड्रोन युनिट गठन गर्ने योजना अघि बढेको जानकारी दिनुभएको छ। उहाँका अनुसार यी संरचनाले अपराध अनुसन्धान र नयाँ किसिमका अपराधसँग जुध्ने प्रहरीको क्षमता बढाउनेछन्।