हिमपातले अवरुद्ध नारापास–हिल्सा सडक तीन दिनभित्र खुलाउने तयारी

भारी हिमपातले बन्द भएको कर्णाली करिडोरको नारापास–हिल्सा सडकखण्ड तीन दिनभित्र खुलाउने लक्ष्यसहित हिउँ पन्छाउने काम तीव्र बनाइएको छ। पूर्वाधार विकासमन्त्री सुनिल लम्सालले शुक्रबार सामाजिक सञ्जालमार्फत यस्तो जानकारी दिनुभएको हो। उहाँका अनुसार मन्त्रालयको डिभिजन टोली जोखिमपूर्ण अवस्थामा हिउँ हटाउन खटिएको छ।

समुद्री सतहबाट करिब ४ हजार ५०० मिटर उचाइको नाउरपानी क्षेत्रमा बाक्लो हिउँ थुप्रिएपछि सडकमा यातायात ठप्प छ। त्यहाँ आवश्यक उपकरण र जनशक्ति परिचालन गरिएको छ। चीनको ताक्लाकोटमा काम गर्न हिल्सा नाका पार गरेका नेपालीलाई चाडपर्वमा घर फर्कन सजिलो बनाउन सडक खुलाउने कामलाई उच्च प्राथमिकता दिइएको मन्त्री लम्सालले बताउनुभएको छ।

जल तथा मौसम विज्ञान विभागका अनुसार आज हिमाली भू-भागमा साधारणतया बादल लाग्नेछ र थोरै स्थानमा मेघगर्जनसहित मध्यमसम्म वर्षा वा हिमपातको सम्भावना छ। भोलि कोशी, गण्डकी, कर्णाली र सुदूरपश्चिम प्रदेशका हिमाली भू-भागका एक-दुई स्थानमा हल्का वर्षा वा हिमपात हुन सक्ने विभागले जनाएको छ। विभागका अनुसार हाल देशमा पश्चिमी वायुको आंशिक प्रभाव छ र आजसम्म पश्चिमी न्यूनचापीय प्रणालीको पनि आंशिक प्रभाव रहन सक्छ।

कर्णाली प्रदेशको राजधानी वीरेन्द्रनगरमा आज तापक्रम ३० देखि ३२ डिग्री सेल्सियससम्म पुग्ने र मेघगर्जनसहित हल्का वर्षाको १० प्रतिशत सम्भावना रहेको विभागले जनाएको छ।