दसैँ बिदामा अस्पतालका आकस्मिक र शल्यक्रिया सेवा नरोकिने

स्वास्थ्य तथा खाद्य स्वच्छता मन्त्रालयले दसैँ बिदाभर अस्पतालका आकस्मिक, शल्यक्रिया, प्रसूति र सघन उपचार सेवा नरोकिने गरी सञ्चालन गर्न निर्देशन दिएको छ। मन्त्रालयले प्रदेशका स्वास्थ्य हेर्ने मन्त्रालय र सबै सङ्घीय सरकारी अस्पताललाई आवश्यक जनशक्ति खटाउन भनेको छ। बिदाका नाममा अस्पताल पूर्ण रूपमा बन्द गर्न नपाइने निर्देशनमा उल्लेख छ।

अस्पतालहरूले औषधि, उपकरण, रगत र रक्तजन्य पदार्थको पर्याप्त मौज्दात राख्नुपर्नेछ। सेवाग्राहीका गुनासो तुरुन्त सम्बोधन गर्न हरेक अस्पतालले एक जना सम्पर्क व्यक्ति तोक्नुपर्नेछ। फूलपातीदेखि कात्तिक ७ गतेसम्मको सार्वजनिक बिदामा धेरैजसो सरकारी अस्पतालका बहिरङ्ग सेवा भने बन्द रहनेछन्।

आकस्मिक कक्ष र भर्ना भएका बिरामीका वार्डमा चिकित्सक, नर्स र अन्य स्वास्थ्यकर्मी पालो मिलाएर खटिनेछन्। ताप्लेजुङको मैवाखोला र मेरिङ्देन गाउँपालिकाले पनि बिदाभर आकस्मिक तथा प्रसूति सेवाका लागि स्वास्थ्यकर्मीलाई जिम्मेवारी तोकेका छन्। मैवाखोलाले मात्रै झन्डै एक दर्जन स्वास्थ्यकर्मी खटाएको छ।