ढुङ्गेबजार–त्रिशूली जोड्ने २६७ मिटर झोलुङ्गे पुल सञ्चालनमा

नुवाकोटको ढुङ्गेबजार र त्रिशूली बजार जोड्ने झोलुङ्गे पुल औपचारिक रूपमा सञ्चालनमा आएको छ। नेपाल निर्माण व्यवसायी महासंघको आर्थिक सहयोग र प्राविधिक समन्वयमा बनेको यो पुल २६७ मिटर लामो छ। महासंघका अध्यक्ष निकोलस पाण्डेले पुलको उद्घाटन गर्नुभएको छ।

गत भदौ १० गतेको भोटेकोशी बाढीपहिरोपछि दुई बजारबीचको आवतजावत टुटेको थियो। भदौको तेस्रो सातादेखि थालिएको निर्माण करिब एक महिनामै सकिएको छ। उद्घाटनमा अध्यक्ष पाण्डेले विकास निर्माणमा ५० ठाउँमा हस्ताक्षर गर्नुपर्ने लामो प्रशासनिक प्रक्रिया मुख्य बाधक रहेको बताउनुभएको छ।

प्रशासनिक झन्झट नहुँदा समयमै गुणस्तरीय काम सम्भव हुने यो पुल उदाहरण भएको उहाँको भनाइ छ। भदौ १९ गतेको स्थलगत निरीक्षणमा सरकारी संयन्त्रसँग आवश्यक उपकरण नदेखिएपछि व्यवसायीले आफ्नै स्रोतसाधन परिचालन गरेको उहाँले बताउनुभएको छ। देशभरका निर्माण व्यवसायीबाट प्रधानमन्त्री दैवी प्रकोप उद्धार कोषमा १० करोड रुपैयाँभन्दा बढी जम्मा भएको जानकारी पनि उहाँले दिनुभएको छ।

विदुर नगरपालिकाका प्रमुख राजन श्रेष्ठ र जिल्ला समन्वय समिति नुवाकोटका प्रमुख राजेन्द्रविक्रम सिंह ठकुरीले विपद्का बेला महासंघले खेलेको भूमिकाको प्रशंसा गर्नुभएको छ।