लमजुङका बस्ती अझै लघुजलविद्युत्को भरमा, प्रसारण लाइनको पर्खाइ

लमजुङका केही बस्ती राष्ट्रिय प्रसारण लाइन नपुग्दा अझै लघुजलविद्युत्को भरमा छन्। नेपाल विद्युत् प्राधिकरण वितरण केन्द्रका प्रमुख सोवितबहादुर क्षेत्रीका अनुसार क्व्होलासोथार गाउँपालिकाका पसगाउँ, सिङ्दीलगायतका बस्तीमा राष्ट्रिय लाइन विस्तार हुन बाँकी छ। राइनास नगरपालिकाको एउटा गाउँका करिब २० घर पनि प्रसारण लाइनसँग जोडिन सकेका छैनन्।

जिल्लाभर हालसम्म ४४ हजार घरमा विद्युत् सेवा पुगिसकेको छ। स्थानीय आयोजनाको उत्पादन घट्दा यी बस्तीमा बिजुली आपूर्ति पनि घट्ने गरेको छ। सिङ्दी गाउँमा करिब २२० देखि २२५ घर छन्।

त्यहाँको लघुजलविद्युत् आयोजनाले पहिले ४० किलोवाट बिजुली उत्पादन गर्ने गरेकामा अहिले बढीमा २५ किलोवाट मात्र उत्पादन भइरहेको छ। उत्पादन घटेपछि गाउँमा दैनिक चार घण्टा विद्युत् आपूर्ति बन्द हुने गरेको छ।