भोटेकोशी बाढीपछि सेनाले १ हजार १०६ जनाको उद्धार गरेको जनायो

नेपाली सेनाले भदौ १० गते रसुवाको भोटेकोशीमा आएको बाढीपछि देशका विभिन्न भागमा भएका विपद्मा गरिएको खोज, उद्धार, राहत र पुनःस्थापनालाई समन्वय र सहकार्यको उत्कृष्ट उदाहरण भनेको छ। सडक र पुल भत्किएर आवागमन ठप्प भएका ठाउँमा परिस्थिति हेरी प्रविधि प्रयोग गर्दै उद्धारलाई प्रभावकारी बनाइएको सेनाले जनाएको छ। सैनिक प्रवक्ता राजाराम बस्नेतका अनुसार प्रतिकूल मौसम र दुर्गम भूगोलका बाबजुद नागरिकको जीवन रक्षालाई पहिलो प्राथमिकता दिइएको थियो।

खोज, उद्धार, राहत वितरण र जोखिममा परेका बासिन्दालाई सुरक्षित ठाउँमा सार्ने काममा सुरक्षा निकायहरू आपसमा समन्वय गरेर खटिएका थिए। रसुवा बाढीपछिको अवस्था सम्झाउँदै सेनाले सार्वजनिक गरेको लेखमा जोखिमपूर्ण ठाउँमा खटिएका सैनिकको साहस र व्यावसायिक दक्षताले जनताको सुरक्षाप्रति सेनाको प्रतिबद्धता देखाएको उल्लेख छ।