भोटेकोशी पुनर्निर्माणमा झन्डै साढे ६ खर्ब रुपैयाँ चाहिने अनुमान, कृषि क्षतिको मूल्याङ्कन जारी

रसुवा–भोटेकोशी विपद्‌बाट प्रभावित क्षेत्रको पुनर्स्थापना र पुनर्निर्माणका लागि ४ अर्ब ७० करोडदेखि ४ अर्ब ७५ करोड अमेरिकी डलर आवश्यक पर्ने प्रारम्भिक अनुमान सरकारले गरेको छ। नेपाल राष्ट्र बैंकको आजको खरिद दरअनुसार यो रकम झन्डै ७ खर्ब १४ अर्बदेखि ७ खर्ब २१ अर्ब रुपैयाँ हुन्छ। कृषि, वन तथा वातावरण मन्त्रालयका प्रवक्ता डा.

महेश्वर ढकालले बुधबार सिंहदरबारमा राष्ट्रियसभाको विशेष समितिको बैठकमा यो जानकारी दिनुभएको छ। गैरआर्थिक क्षति जोड्दा रकम अझै बढ्न सक्ने र विस्तृत आधिकारिक मूल्याङ्कन पछि सार्वजनिक गरिने उहाँको भनाइ छ। तत्कालको पुनर्स्थापनाका लागि मात्र करिब ५ करोड ७० लाख डलर चाहिने र यो रकम सरकार एक्लैले जुटाउन नसक्ने ढकालले बताउनुभएको छ।

अन्तर्राष्ट्रिय लस एन्ड ड्यामेज कोषले नेपाललाई करिब २ करोड डलरका लागि प्रस्ताव पेस गर्ने अवसर दिएको छ। कोषको सचिवालयबाट पत्र आएपछि प्रस्ताव तयार गरिनेछ। मन्त्रालयका सचिव डा.

राजेन्द्रप्रसाद मिश्रले बाली, पशुपन्छी, जलचर, बगाएको जमिन र जैविक विविधताको क्षति छुट्टाछुट्टै शीर्षकमा मूल्याङ्कन भइरहेको बताउनुभएको छ। त्रिशूली करिडोरमा माछा र अन्य जलचरको क्षतिको आर्थिक आकलन चुनौतीपूर्ण रहेको उहाँको भनाइ छ। बालीको क्षति राष्ट्रिय योजना आयोगको प्रतिवेदनमा समेटिनेछ।

समितिका सभापति कृष्णप्रसाद पौडेलले प्रभावित ४९ वडाको वडागत क्षति विवरण माग्नुभएको छ। विवरण आएपछि मात्र समितिले स्थलगत अनुगमन गर्ने तयारी गरेको छ।