त्रिशूली–नारायणी किनार र मुग्लिनसम्म सतर्कता, आरुघाट अस्पतालका बिरामी सारिए

बूढीगण्डकीमा बाढी आएसँगै त्रिशूली र नारायणी नदी किनारका बासिन्दालाई उच्च सतर्कता अपनाउन प्रशासनले आग्रह गरेको छ। बाढी पूर्वानुमान महाशाखाले मुग्लिनसम्मको क्षेत्रलाई उच्च जोखिममा राखेको छ र त्यहाँका बासिन्दालाई सुरक्षित अग्लो स्थानमा जान भनेको छ। चितवन र नवलपरासीका नदी आसपासका क्षेत्रलाई भने मध्यम जोखिममा राखिएको छ।

चितवन जिल्ला प्रहरी कार्यालयका प्रमुख रामेश्वर पौडेलका अनुसार देवघाटमा दाहसंस्कार गर्नेलाई अग्लो ठाउँमा जान र नारायणी किनारमा ठेला वा रिक्सामा व्यापार नगर्न माइकिङ गरिएको छ। माछा मार्ने र पौडी खेल्नेलाई पनि सतर्क रहन भनिएको छ। मुग्लिनमा पनि प्रहरीले माइकिङ गरिरहेको छ, तर चितवनमा हालसम्म बाढी नपसेको प्रहरीले जनाएको छ।

गण्डकी प्रदेश स्वास्थ्य मन्त्रालयका अनुसार गोरखाको आरुघाट आधारभूत अस्पतालका बिरामी र कर्मचारीलाई एम्बुलेन्समार्फत सुरक्षित स्थानमा सारिएको छ। गोरखा, लमजुङ र तनहुँका द्रुत प्रतिकार्य टोली तयारी अवस्थामा राखिएका छन्। स्वास्थ्य तथा खाद्य स्वच्छता मन्त्रालयले स्वास्थ्य आपत्कालीन कार्यसञ्चालन केन्द्र सक्रिय बनाएको छ र सहयोग चाहिएमा १११५ मा सम्पर्क गर्न सकिने जनाएको छ।

बाढीको दोस्रो लहर तलतिर सर्दै गरेकाले आरुघाटदेखि त्रिशूली दोभानसम्मका तटीय बासिन्दालाई उच्च सतर्कता अपनाउन प्रदेश सरकार र स्थानीय प्रशासनले आग्रह गरेका छन्।