हिमाल–पहाडमा आंशिक बदली, केही स्थानमा मेघगर्जनसहित वर्षा

जल तथा मौसम विज्ञान विभागले आज देशका हिमाली र पहाडी क्षेत्रमा आंशिक बदली रहने र तराईमा मौसम प्रायः सफा रहने पूर्वानुमान जारी गरेको छ। विभागका अनुसार अहिले पश्चिमी न्यून चापीय प्रणाली र मनसुनी वायु दुवैको असर देशमा परेको छ। कोशी, कर्णाली र सुदूरपश्चिम प्रदेशका पहाडी तथा हिमाली भेगका केही ठाउँमा चट्याङसहित मध्यमसम्मको वर्षा हुन सक्ने विभागले जनाएको छ।

बागमती, गण्डकी र लुम्बिनी प्रदेशका हिमाली र पहाडी भेगका एक-दुई ठाउँमा पनि यस्तै वर्षाको सम्भावना छ। काठमाडौँमा तापक्रम २५ देखि २७ डिग्री सेल्सियससम्म रहने र वर्षाको सम्भावना ३० प्रतिशत रहेको विभागले उल्लेख गरेको छ। पोखरा र वीरेन्द्रनगरमा २० प्रतिशत वर्षाको सम्भावना छ, पोखराको तापक्रम २७ देखि २९ र वीरेन्द्रनगरको २८ देखि ३० डिग्री सेल्सियस रहने अनुमान छ।

तराईका जनकपुरमा ३२ देखि ३४ डिग्री, विराटनगर र नेपालगञ्जमा ३१ देखि ३३ डिग्री सेल्सियससम्म तापक्रम रहने र वर्षाको सम्भावना नरहेको जनाइएको छ। भोलि पनि हिमाली र पहाडी भागमा आंशिक बदली तथा तराईमा सफा मौसम रहने विभागको पूर्वानुमान छ। भोलि कोशी, बागमती र कर्णाली प्रदेशका हिमाली भेगका एक-दुई स्थानमा चट्याङसहित हल्का वर्षा वा हिमपात हुन सक्ने विभागले जनाएको छ।