घटस्थापनासँगै बडादसैँ सुरु, हनुमानढोकाको दसैँघरमा जमरा

घटस्थापनासँगै आजदेखि बडादसैँ सुरु भएको छ। नेपाल पञ्चाङ्ग निर्णायक विकास समितिले तोकेको बिहान ११ बजेर ४७ मिनेटको साइतमा घरघरका पूजाकोठा र दसैँघरमा जमरा राखिएको छ। समितिका अध्यक्ष सहप्राध्यापक डा.

पुरुषोत्तम भट्टराईका अनुसार आज दिनभर चित्रा नक्षत्र परेकाले मध्याह्नको अभिजित् मुहूर्तमा साइत तोकिएको हो। सोमबार घटस्थापना गर्नुपर्ने कुरा सामाजिक सञ्जालमा फैलिएपछि समितिले स्वस्तिशान्ति गरेर आजै जमरा राख्न आह्वान गरेको थियो। यसलाई शारदीय नवरात्र पनि भनिन्छ र नौ दिनसम्म नवदुर्गाका फरक स्वरूपको पूजा हुन्छ।

काठमाडौँको हनुमानढोका दरबारभित्रको दसैँघरमा पनि मन्त्रोच्चारणसहित विधिपूर्वक जमरा राखिएको छ। सो अवसरमा नेपाली सेनाको टोलीले धिमे र भुस्यासहित मङ्गलधुन बजाएर तथा बन्दुक पड्काएर बधाइँ गरेको थियो। घरघरमा दियो, कलश र गणेशको स्थापना गरी शक्तिकी देवी दुर्गाको आवाहन गरिन्छ।

नवरात्रको पहिलो दिन शैलपुत्रीको पूजा हुन्छ। धर्मशास्त्रविद् तोयराज नेपालका अनुसार शास्त्रले जमराका लागि जौ मात्र रोप्ने विधि बताएको छ, तर धेरै ठाउँमा मकै र गहुँ पनि छर्ने चलन छ। भक्तपुरको ब्रह्मायणी घाटमा आज बिहानैदेखि जमराका लागि माटो लिन भक्तजनको भीड लागेको छ।

त्यहाँको बालुवा मिसिएको माटोमा जमरा पहेँलो र बलियो उम्रने जनविश्वास छ। विजयादशमीका दिन यही जमरा टीकासँगै प्रसादका रूपमा लगाइन्छ।