मौसम पूर्वानुमान क्षमता सात दिनसम्म विस्तार: ऊर्जामन्त्री

ऊर्जा, जलस्रोत तथा सिँचाइमन्त्री विराजभक्त श्रेष्ठले मौसम पूर्वानुमान गर्ने क्षमता सात दिनसम्म बढाइएको बताउनुभएको छ। न्युज एजेन्सी नेपालसँग कुरा गर्दै उहाँले अहिलेसम्म तीन दिनअघिको मात्र पूर्वानुमान सम्भव भएकोमा अब सात दिनअघिसम्मको पूर्वानुमान दिने प्रणाली बनाउन सरकारले काम गरिरहेको जानकारी दिनुभएको छ। नदीको पानीको सतह लगातार अनुगमन गर्ने प्रणालीलाई पनि दिगो बनाउने काम भइरहेको मन्त्री श्रेष्ठको भनाइ छ।

प्रशान्त महासागरमा बन्दै गरेको सुपर एल निनोले पार्न सक्ने असरबारे मन्त्रालयले जिम्मेवारी लिएको सुरुकै चरणमा अध्ययन गरी व्याख्या गरिसकेको उहाँले बताउनुभएको छ। जलवायु परिवर्तनका कारण वर्षाको ढाँचा फेरिन थालेकाले पूर्वानुमानलाई अझ प्रभावकारी र भरपर्दो बनाउनुपर्ने उहाँको धारणा छ। विपद्को जोखिम घटाउन पूर्वसूचना प्रणाली मात्र पर्याप्त नहुने पनि मन्त्री श्रेष्ठले बताउनुभएको छ।