निजी क्षेत्रसँग मिलेर सीपयुक्त जनशक्ति उत्पादन: श्रममन्त्री यादव

युवा, श्रम तथा रोजगारमन्त्री रामजी यादवले निजी क्षेत्रसँग मिलेर बजारको माग अनुरूप दक्ष जनशक्ति तयार पार्ने र उनीहरूलाई रोजगारीसँग जोड्ने बताउनुभएको छ। भक्तपुरमा आइतबार एभरेष्ट मल्टिस्किल प्राइभेट लिमिटेडले चलाएको सीपमूलक तालिम केन्द्र उद्घाटन गर्ने क्रममा उहाँले यस्तो धारणा राख्नुभएको हो। उहाँका अनुसार उद्योग, निर्माण, पर्यटन, कृषि, सूचना प्रविधि र सेवा क्षेत्रमा दक्ष कामदारको माग छ।

युवाले काम नपाउने र रोजगारदाताले सीपयुक्त कामदार नभेट्ने अवस्था अन्त्य गर्न सीप विकासलाई प्राथमिकता दिनुपर्ने मन्त्री यादवको भनाइ छ। उहाँले रोजगारदाता र उद्योगीलाई तालिम केन्द्रसँग सहकार्य गर्न, प्रशिक्षार्थीलाई व्यावहारिक अनुभव दिन र सीप सिकेका युवालाई काममा लगाउन आग्रह गर्नुभएको छ। सीप विकास कार्यक्रम प्रभावकारी बनाउन सरकार, निजी क्षेत्र, तालिम दिने संस्था र स्थानीय तहबीच सहकार्य आवश्यक रहेको उहाँको धारणा छ।