बूढीगण्डकी बाढी: सेनाका चार हेलिकप्टर परिचालन, ३६ जनाको उद्धार

बूढीगण्डकी बाढी प्रभावित क्षेत्रमा नेपाली सेनाका चार हेलिकप्टर र स्थलमार्गका टोली खटाएर उद्धार कार्य भइरहेको छ। सेनाका अनुसार पहिलो चरणमा जगतबाट ६, न्याक्फेदीबाट ९, यारुबाट एक शिशु र एक विदेशी नागरिकसहित ९ तथा पायुबाट १२ गरी ३६ जनाको उद्धार गरिएको थियो। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार हेलिकप्टरबाट उद्धार हुनेको सङ्ख्या पछि करिब ४७ पुगेको छ।

प्राधिकरणका अनुसार सेनाका १२७, नेपाल प्रहरीका १३३ र सशस्त्र प्रहरी बलका १७७ गरी करिब ४३७ सुरक्षाकर्मी परिचालित छन्। प्रहरीको थप करिब ५० जनाको टोली तयारी अवस्थामा राखिएको छ। प्रधानमन्त्री बालेन्द्र शाहले काठमाडौँमा रहेको कम्पोजिट क्विक रियाक्सन टिम पनि हवाई माध्यमबाट प्रभावित क्षेत्रमा पठाइएको बताउनुभएको छ।

चुमनुब्री–६ चुम्चेतको उङ्गिलुङस्थित भेडीगोठमा रहेका ५ जनाको खोजी जारी रहेको प्राधिकरणले जनाएको छ। सडक सञ्चालन र बेलिब्रिज राख्ने सम्भाव्यता अध्ययन गर्न छुट्टै टोली खटाइएको प्राधिकरणले जनाएको छ। प्राधिकरणका कार्यकारी प्रमुख डा.

धर्मराज उप्रेतीका अनुसार सुरुमा प्रतिकूल मौसमले हेलिकप्टर अवतरणमा अवरोध भएको थियो। इलाका प्रहरी कार्यालय आरुघाटको टोलीले नदी किनारका २४ जनालाई सुरक्षित स्थानमा सारेको प्राधिकरणले जनाएको छ।