बन्द भएका सरकारी वेबसाइट क्रमशः खुले, केही जोखिम अझै बाँकी

सुरक्षा जोखिमका कारण बन्द गरिएका सरकारी र बैंकिङ क्षेत्रका वेबसाइट क्रमशः पुनः सञ्चालनमा आउन थालेका छन्। वेबसाइट बनाउन प्रयोग हुने पीएचपी प्रविधिमा गम्भीर सुरक्षा कमजोरी देखिएपछि गत बिहीबारदेखि ती वेबसाइट बन्द गरिएका थिए। प्रधानमन्त्री तथा मन्त्रिपरिषद्को कार्यालयअन्तर्गतको सफ्टवेयर विकास तथा सञ्चालन केन्द्रका अनुसार सुरक्षा प्याच, परीक्षण र प्रमाणीकरण सकिएपछि एक हजारभन्दा बढी डोमेन पुनर्स्थापना गरिएका छन्।

अर्थ मन्त्रालय, सञ्चार तथा सूचना मन्त्रालय र प्रधानमन्त्री कार्यालयका वेबसाइट तथा अनलाइन सेवा सञ्चालनमा आइसकेका छन्। सूचना प्रविधि तथा विद्युतीय शासन कार्यालयका निमित्त प्रमुख सुभाष ढकालले लोकसेवा आयोग, राहदानी विभाग र यातायात व्यवस्था विभागका प्रणालीमा काम जारी रहेको बताउनुभएको छ। बाँकी सेवा पनि छिट्टै पूर्ण रूपमा सुचारु गर्न कर्मचारी खटिरहेको केन्द्रले जनाएको छ।

कृषि विकास बैंकले आफ्ना प्रणाली पीएचपीको स्तरोन्नत संस्करणमै रहेकाले असर नपरेको र सुरक्षा जाँचपछि सबै बैंकिङ सेवा पुनः सुचारु भएको जनाएको छ। बैंकको अनलाइनबाट खाता खोल्ने सुविधा भने नयाँ संस्करणमा स्तरोन्नति भइरहेकाले पछि मात्र खुल्नेछ।