चलचित्र विकास बोर्डमा नयाँ अध्यक्ष मनिष पण्डित, बोर्ड सबैको साझा बनाउन मन्त्रीको आग्रह

मनिष पण्डितले चलचित्र विकास बोर्डको अध्यक्षका रूपमा सोमबार पदभार ग्रहण गर्नुभएको छ। बोर्डको कार्यालयमा कर्मचारी र पदाधिकारीले उहाँलाई फूलमाला लगाएर स्वागत गरेका छन्। त्यसअघि उहाँले मन्त्रालयमा सञ्चार तथा सूचना प्रविधिमन्त्री डा.

विक्रम तिमिल्सिनाबाट नियुक्तिपत्र बुझ्नुभएको थियो र पद तथा गोपनीयताको शपथ लिनुभएको थियो। असोज ३० को मन्त्रिपरिषद् बैठकले उहाँलाई अध्यक्षमा नियुक्त गर्ने निर्णय गरेको थियो। यो पदका लागि करिब एक दर्जन जनाले आवेदन दिएका थिए।

मन्त्रालयले पण्डित, नरेशकुमार पौडेल र अभिनेत्री निशा अधिकारीलाई अन्तिम तीनमा राखेर मन्त्रिपरिषद्मा सिफारिस गरेको थियो। नियुक्तिपत्र हस्तान्तरणका क्रममा मन्त्री तिमिल्सिनाले बोर्डलाई सबै चलचित्रकर्मीको साझा संस्था बनाउन आग्रह गर्नुभएको छ। बोर्ड सबैको हुन नसकेको गुनासो चलचित्रकर्मीमाझ रहेको र उनीहरूले वर्तमान सरकारसँग ठूलो अपेक्षा राखेको उहाँले बताउनुभएको छ।

सरकारको काम चलचित्र बनाउनु नभई सही नीति, वातावरण र प्रोत्साहन दिनु भएको उहाँको भनाइ छ। निर्माता तथा लेखक पण्डितले यसअघि जाइरा र ग्याङस्टार ब्लुज फिल्मको निर्माण टोलीमा काम गर्नुभएको थियो। बोर्डमा विज्ञ, सल्लाहकार र बक्स अफिस परामर्शदाताका रूपमा पनि उहाँले काम गरिसक्नुभएको छ।

सिनेमा हलमा बक्स अफिस प्रणाली र ई-टिकेटिङ लागू गर्ने प्रक्रियामा पनि उहाँ संलग्न हुनुहुन्थ्यो।