चिनियाँ कम्युनिस्ट पार्टीको पूर्ण बैठक बेइजिङमा सुरु

चिनियाँ कम्युनिस्ट पार्टीको २० औँ केन्द्रीय समितिले आफ्नो पाँचौँ पूर्ण बैठक सोमबार बिहान बेइजिङमा सुरु गरेको छ। पार्टी महासचिव तथा राष्ट्रपति सी चिनफिङले राजनीतिक ब्युरोका तर्फबाट कार्यप्रगति प्रतिवेदन पेस गर्नुभएको छ। उहाँले पार्टीभित्र पूर्ण र कठोर स्व-अनुशासन सुदृढ गर्ने प्रमुख निर्णयको मस्यौदा पनि प्रस्तुत गर्नुभएको छ।

सरकारी समाचार संस्था सिन्ह्वाका अनुसार उक्त मस्यौदामा पार्टीको अनुशासन र स्वशासन बलियो बनाउने रणनीतिक योजना समेटिएको छ। बैठकले नयाँ युगमा स्व-अनुशासनका उपलब्धि, अनुभव र चुनौती केलाउँदै थप ठोस उपायमाथि छलफल गर्नेछ। भ्रष्टाचार नियन्त्रण र कार्यकर्ताको कार्यक्षमता तथा वफादारी बढाउने विषय पनि छलफलको केन्द्रमा छन्।

बन्द कोठामा कडा सुरक्षाबीच चलिरहेको बैठकमा केन्द्रीय समितिका करिब ३०० सदस्य सहभागी छन्। यो बैठक आगामी वर्ष हुने पार्टी महाधिवेशन र नेतृत्वको सम्भावित फेरबदलअघि बसेको हो। सी सन् २०१२ मा सत्तामा आउँदा पार्टीका हरेक तहबाट भ्रष्टाचार निर्मूल पार्ने प्रतिबद्धता जनाउनुभएको थियो।

चीनका अनुशासन निकायले सन् २०२५ मा मन्त्री वा प्रान्तीय तहका सयभन्दा बढी अधिकारीसहित १० लाखभन्दा बढी व्यक्तिमाथि अनुसन्धान सुरु गरेका थिए।