तिहार नजिकिँदै: सयपत्री फुल्यो, तनहुँका महिलाको १० लाखको फूल बेच्ने लक्ष्य

तिहार नजिकिँदै गर्दा तनहुँको आँबुखैरेनी गाउँपालिका–१ आँधीमूल यान्चोकका महिलाले करिब १० लाख रुपैयाँको सयपत्री फूल बेच्ने लक्ष्य राखेका छन्। सामूहिक व्यावसायिक खेती गर्दै आएका यहाँका महिलाले गत वर्ष झन्डै ९ लाख रुपैयाँको फूल बेचेका थिए। अहिले उनीहरू फूल टिप्ने, बिक्रीको तयारी गर्ने र भण्डारण गर्ने काममा व्यस्त छन्।

तीन वर्षअघि सुरु भएको यो खेती अहिले करिब ४५ रोपनीमा फैलिएको छ र यसमा ४५ जना महिला आबद्ध छन्। समूहका अध्यक्ष सुन्तली गुरुङका अनुसार टिपिएका फूल बिक्री नहुन्जेल ताजा राख्न चिस्यान केन्द्रमा राखिएको छ। यो खेती आम्दानीको स्रोत मात्र नभई आर्थिक आत्मनिर्भरतातर्फको अवसर पनि बनेको उहाँले बताउनुभएको छ।

उत्पादन र खेतीको क्षेत्र बढेसँगै बजारबाट माग आउन थालेको छ। स्थानीय उत्पादनले बाहिरबाट आउने फूलमाथिको निर्भरता घटाउन पनि सघाएको छ। यता, काठमाडौँ उपत्यकामा पनि मौसम खुलेसँगै विभिन्न ठाउँमा सयपत्री ढकमक्क फुलेका छन्।

पहेँलो र सुन्तला रङका यी फूल तिहारमा घर सजाउन, माला उन्न र पूजामा प्रयोग हुन्छन्। उपत्यकाबाट हिमशृङ्खला पनि सफा देखिन थालेका छन्।