एनपीएलको तेस्रो संस्करण आज सुरु: प्रधानमन्त्रीद्वारा उद्घाटन, लुम्बिनी र सुदूरपश्चिम भिड्दै

नेपाल प्रिमियर लिग अर्थात् एनपीएलको तेस्रो संस्करण आज सोमबारदेखि सुरु हुँदैछ। कीर्तिपुरस्थित त्रिवि अन्तर्राष्ट्रिय क्रिकेट मैदानमा साँझ ५ बजे हुने उद्घाटन खेलमा साविक विजेता लुम्बिनी लायन्स र उपविजेता सुदूरपश्चिम रोयल्स भिड्दैछन्। प्रधानमन्त्री बालेन्द्र शाहले दुवै टोलीका खेलाडीसँग परिचय गरी अम्पायरलाई बल हस्तान्तरण गरेर प्रतियोगिता उद्घाटन गर्ने कार्यक्रम छ।

आयोजक क्यान र प्रधानमन्त्रीको सचिवालयका अनुसार समारोह छोटो राखिएको छ र प्रधानमन्त्रीको भाषण हुने छैन। उद्घाटनअघि नै प्रधानमन्त्री शाहले फेसबुकमार्फत एनपीएललाई देशकै सबैभन्दा ठूलो खेलकुद उत्सव भन्दै शुभकामना दिनुभएको छ। लुम्बिनीको नेतृत्व कप्तान रोहित पौडेल र सुदूरपश्चिमको नेतृत्व दीपेन्द्रसिंह ऐरीले गर्नुभएको छ।

अघिल्लो संस्करणको फाइनलमा लुम्बिनीले सुदूरपश्चिमलाई ६ विकेटले हराएर उपाधि जितेको थियो। पहिलो संस्करणको उपाधि भने जनकपुर बोल्ट्सले जितेको थियो। आठ टोली सहभागी यो प्रतियोगितामा कुल ३२ खेल हुनेछन्।

उद्घाटन दिनका सबै टिकट बिक्री भइसकेका छन्। मैदानदेखि खेलाडी बसेका होटलसम्मको सुरक्षाका लागि एक हजारभन्दा बढी सुरक्षाकर्मी खटाइएका छन्। खेलहरू हिमालयन स्पोर्ट्स च्यानलबाट प्रत्यक्ष प्रसारण हुनेछन् र दर्शकले यसका लागि अतिरिक्त शुल्क तिर्नुपर्ने छैन।